Presidenti rus Putin do të vizitojë Kinën në maj, njofton Reuters.
Pekin/Moskë – Presidenti rus Vladimir Putin do të shkojë në Kinë në muajin maj për të biseduar me Presidentin Xi Jinping, në atë që mund të jetë udhëtimi i parë jashtë shtetit i kreut të Kremlinit në mandatin e tij të ri presidencial. Kështu njofton sot Reuters, duke cituar pesë burimeve me dijeni për këtë çështje.
Qeveritë perëndimore e dënuan të hënën rizgjedhjen e Putinit si të padrejtë dhe jodemokratike. Por Kina, India dhe Koreja e Veriut e uruan udhëheqësin veteran për zgjatjen e sundimit të tij me gjashtë vjet të tjera.
“Putini do të vizitojë Kinën,” i tha Reuters një nga burimet, i cili foli në kushte anonimiteti. Detajet u konfirmuan në mënyrë të pavarur nga katër burime të tjera, të cilët gjithashtu folën në kushte anonimiteti.
Kremlini nuk pranoi të komentojë. Ministria e Jashtme e Kinës nuk iu përgjigj menjëherë një kërkese për koment.
Kina i ka forcuar lidhjet e saj tregtare dhe ushtarake me Rusinë vitet e fundit pasi Shtetet e Bashkuara dhe aleatët e saj vendosën sanksione kundër të dy vendeve, veçanërisht Moskës për pushtimin e Ukrainës.
Të dy vendet deklaruan një partneritet “pa kufij” në shkurt 2022 kur Putin vizitoi Pekinin vetëm disa ditë para pushtimit.
Diplomatët dhe vëzhguesit e huaj thanë se prisnin që Putin të bënte në Kinë, vizitën e tij të parë pasi rizgjedhjes si President i Rusisë. Inaugurimi zyrtar presidencial i Putinit do të bëhet rreth 7 majit.
Putin u tha gazetarëve të dielën se Rusia dhe Kina kanë një këndvështrim të ngjashëm global, gëzonin marrëdhënie elastike pjesërisht për shkak të marrëdhënieve të mira personale të Putinit dhe Xi dhe se Moska dhe Pekini do të zhvillojnë më tej lidhjet në vitet e ardhshme.
Xi e vizitoi Rusinë në udhëtimin e tij të parë jashtë shtetit pas pandemisë në mars të vitit të kaluar, pak pasi filloi mandatin e tij të tretë si president kinez.
Të dy liderët shpesh e kanë deklaruar miqësinë e tyre të ngushtë personale dhe janë takuar mbi 40 herë, më së fundi në tetor kur Putin ishte i ftuari i nderit në samitin e Kinës “Një brez dhe një rrugë” në Pekin.
